Ginpasaeamatan ni Kalibo Mayor Juris Bautista Sucro ro tanan nga kapulisan nga nagbulig sa pagbantay ag pagsiguro sa seguridad agud maging madinaeag on ro selebrasyon it Kalibo Senior Santo Niño Ati-Atihan Festival 2024.
Suno kay Mayor Sucro, sa kabilugan hay naging matawhay ro selebrasyon purya eon lang sa daywa ka grupo nga nag away ku January 18, ag bisan may mga pulis eon hay owa gihapon nagpa-awat ro mga raya.
Ginapa-identify man it alkalde kung sin-o ag pila ro mga pulis nga umawat sa nasambit nga kinagamo agud mataw-an segun nana it bulig bangud ginhimo gid it mga pulis ro andang trabaho para mapundo ro away it daywa ka grupo.
Matandaan nga insigidang gin-aksyunan it LGU Kalibo ro natabo nga kinagamo kung siin, total ban eon ro mga grupo it Lagalag ag Bayangan Village band sa pag-intra sa Kalibo Ati-Atihan. // ANN DESLENE SALAZAR
