Nakapahaom eun ro Kalibo International Airport para sa pagdagsa it mga biyahero, base kay airport manager Engineer Eusebio Monserate Jr.
Ginaasahan man it mga personnel it airport nga maabong mga turista ro maabot kapin pa ro mga bisita nga paadto sa isla it Boracay.
Kaangut dikara, magapadayon eun man ro mga international flights.
Sa presente, ro mga flight sa Kalibo airport hay limitado ag tatlong mga airline companies kapareho it Philippine Airlines, Cebu Pacific ag Air Asia Philippines pa eang ro nagabiyahe sa probinsiya.
Sa pihak nga bahin, ro Caticlan airport hay masako eun bangud raya ro gintaeana nga entry ag exit point para sa mga turista sa Boracay.
Umpisa ku November 16, ro mga biyahero nga fully vaccinated hay indi eun kinahangean nga magsumite it swab test result o saliva test.
Sa gihapon, ginpahanumduman ro mga biyahero nga dapat pagasundon ro mga minimum health standards./JIL B. LACSON
