Kakulangan sa classrooms ang rason kun ngaman shifting ang klase sang mga estudyante sa Capiz National High School (CNHS).
Ini ang ginkumpirma ni Mr. Charlie D. Begas, School Principal IV sa CNHS sang ma-interview sang Brigada News FM Roxas City.
Suno kay Begas, 2 shifting ang mode of instruction sa Capiz National High School kun sa diin sa isa ka room duha ka grade levels kag duha ka section ang naga-occupy.
Ang grade 7 kag 8 isa ka room ang ginabulusbulusan, amo man sa grade 9 to 10 kag grade 11 to 12.
Ang klase naga-umpisa sa 7:00 am to 12:00 pm kag 12:00 pm to 5:00 pm.
Dugang pa ni Begas, may duha ka building sa nasambit nga buluthuan ang indi na pwedi maklasehan bangud guba na kag indi naman pwedi nga makay-o pa kundi kinahanglan na sang replacement.
Ginpahayag man sini nga ang DepEd-Capiz ang nagaplano nga magpatukod sang 40 classrooms kun sa diin nadala na ini sa budget sa general appropriations act sa year 2024.
Nahibaluan nga nagnubo man ang mga enrollees sa Junior High School sa CNHS bangud madamo na sang mga integrated schools sa probinsya. | Judy Ann Juare
