“Nothing personal against him it is only an opinion on an issue of public interest.”
Mao kini ang pagpaklaro ni Kagawad Franklin Gacal Jr. kalabot sa pagtawag niining unethical alang kang Kagawad Jose Edmar Yumang nga maoy nagsilbing abogado sa suspek sa Yentez Quintoy slay case.
Gihingusgan ni Gacal, nga mahimo man nga gunitan ni Yumang ang maong kaso, apan kinahanglang buhian niini ang chairmanship sa Peace and Order Committee sa konseho tungod kung dili, mawad-an kini og moral ascendancy sa kapulisan kinsa maoy gahimo og mga imbestigasyon sa mga shooting incident sa GenSan.
Sa karon dili pa masuta ni Gacal unsa ang lawom nga rason, apan sa nadunggan niini mismo kang Yumang, nga gusto lang niini nga mapagawas ang kamatuoran ug mahatag ang hustisya sa maong krimen.
Dungan niini gitino ni Gacal nga wala siya nakig-away kang Yumang apan gusto lang niini, tul-iron unsa ang maayo ug ipasabot ang iyang nahimong baruganan. Abli usab ang Brigada alang sa komento ni Yumang sa nahimong pamahayag ni Gacal kalabot sa maong isyu.
