Base kay Department of Tourism (DOT) secretary Bernadette Romulo-Puyat, ginaasahan nanda nga ro isla it Boracay ro pinakauna nga tourism destination sa Pilipinas nga may 100% vaccinated status.
Tuyo pa nanda nga sa katapusan it Oktubre, tanan nga mga tourism workers ag residente hay mabakunahan kuntra sa virus.
Matandaan nga ku Oktubre 19, 77.87% sa target nga 24, 451 indibidwal, hay nabakunahan eun kuntra sa COVID-19 infection.
Sa datos it tourism top executive, 91.96% o 11,179 sa target nga 12,809 active tourism frontliners hay nabakunahan eun. Kaeakip dikara ro mga tricycle drivers, massage therapists, ag mga vendors it mga souvenirs shops, ag iban pa.
Ro pagnaba it kaso it mga ginatamaan it COVID-19 hay bangud sa agresibo nga pagbakuna ag dedikasyon it mga tourism stakeholders para maka-comply sa mga ginapatuman nga protocols ag safety guidelines.
Base pa kay Puyat, nagaasa sanda nga kung ‘fully vaccinated’ eun ro Boracay, mas maabong mga turista ro mabisita lalo eun sa Paskwa./JIL B. LACSON
