Dili magpanuko ang Tugbok Police Station nga pasakaan og kaso ang responsable sa paglabay sa bag-ong natawo nga batang babaye sa sagbuto nga bahin sa Purok 10, Upper Tugbok ning syudad sa Davao.
Matud kang Police Major Noel Villahermosa ang Hepe sa Tugbok, kaso ang atubangon sa inahan nga milabay sa kaugalingong anak sa higayon nga ilang madakpan.
Una niini, nakit-an na lamang sa mga residente ang bag-ong gihimugsong bata nag wala pa naputol ang umbilical cord ug nagkadugo sa sagbuton nga bahin sa maong lugar.
Anaa na karon sa luwas nga kahimtang ang bata sa pag-atiman sa Department of Social Welfare and Development kon DSWD. Nakig-alayon ang kapulisan sa mga tawo ug opisyales sa maong lugar aron subayon kung si kinsa ang inahan sa bata.
