MITAAS ang ihap sa pasahero nga miabot sa Bulaong terminal sa GenSan sa tuig 2022 tandi sa nakalabay nga 2021, kini dungan sa pagbalik sa ekonomiya sa syudad gikan sa nasinatiang pandemya. Pipila sa mga pasahero nanguli sa ilang mga lugar atol sa nakalabay nga yuletide season.
Basi sa datus nga gipagula ni Raymond Ledesma, labaw sa Bulaong terminal, sa 250 ka biyahe sa Yellow Bus niadtong Disyembre 25, 2021 kapin 3,912 ka pasahero ang misakay. Samtang pag-abot sa Disyembre 25, 2022 misaka sa 5,311 ka pasahero ang misakay sa bus sa 257-ka trip vice-versa.
Lakip mitaas ang ihap sa mga sumasakay kaniadtong dispiras sa bag-ong tuig asa mikabat sa 7,901 passengers ang miabot sa Bulaong terminal nga misakay og bus. Butyag sa opisyal ang pagdaghan sa mga pasahero nga nagaabot sa terminal sa syudad dunay nakatabang sa mga mamaligyaay lakip na sa mga traysikel drayber nga nagahulat og pasahero.
Gilauman ni Ledesma nga magpadayon ang pagbalik sa new normal nga sitwasyon aron molambo pa ang dakbayan. I Enamie Mogpon
