Owa it duha-duha nga ginbuligan it personnel it Ibajay Municipal Police Station ro sangka ice buko vendor nga gulping nahilo ag natumba sa anang ginasakyan nga bike.
Ginkilaea ro ice buko vendor nga si Raymundo Casuncad, 63 anyos, may asawa ag sambilog nga unga nga residente it Brgy. Sta Cruz, Ibajay, Aklan.
Insigida rayang ginsakay it personnel it Ibajay MPS sa andang patrol ag dinaea sa maeapit nga ospital.
Samtang sa biyahe hay naistorya segun ni lolo nga alas syete pa eang it agahun hay naga umpisa eon imaw nga maglako it ice buko.
Pag abot sa hospital gintan-aw eagi it nurse ag doctor si lolo Raymundo ag ginpapahuway ag kat mayad eon ro anang pamatyag hay ginpasugtan eon imaw nga mag uli it doctor.
Ginsakay it uman si lolo it Ibajay MPS para ihatud sa Brgy. Polo, Ibajay, Aklan para iremit ro kabakeanan nana nga 60 bilog nga ice buko ag mabuoe man segun nana ro anang porsyento para may panggastos man sanda sa pang adlaw-adlaw.
Ginhatud man imaw sa andang Barangay kong siin imaw nagaistar ngani mabahoe ro pasaeamat ni lolo Raymundo sa Ibajay MPS eabi pa ag tinaw-an man imaw it mga kapulisan it sangkiri nga bulig. / ANN DESLENE SALAZAR
