Agud mapataas ro produksyon ag kita it mga mangugnguma it paeay sa Aklan, ginasulong it Department of Agriculture (DA) ro paggamit it hybrid varieties it paeay sa pila ka mga kabarangayan sa Numancia, Akean.
Sa harvest festival ag field day nga ginhiwat ku kan-o eamang, ginhambae ni DA Western Visayas Agricultural Program Coordinating Officer (APCO) Aklan, Glenn Mariano, nga target it Community Hybrid Rice Model Farm nga ipakita sa mga mangunguma ro pakinabang it pagtanom it mga hybrid varieties nga paeay sa pagsiguro it mas manami nga kita ag suplay it pagkaon.
Sa nasambitan nga programa, may kabieogan nga154 nga mga mangunguma ro nakabaton it 202 sako it hybrid seeds ag 1,198 sako it fertilizer.
Nakabaton man sanda it mga agricultural machinery, 10 granular applicators, sambilog ka riding-type transplanter, ag sambilog ka hauling truck.
Ro community hybrid rice demonstration project it DA hay ginalunsar man sa Guimaras, Negros Occidental, Antique, Iloilo, ag Capiz./JIL B. LACSON
