Ginkumpirma ni Police Captain Dennis Losbañes, hepe sang Sigma Municipal Police Station nga sa Roxas City nagakuha sang suplay sang shabu ang High Value Individual nga nadakpan matapos gin-implementaran sang search warrant sang mga kapulisan sa Brgy. Parian, Sigma, Capiz.
Ginkilala ang nadakpan kay Baltazar Borres Bastian, 47-anyos kag residente man sang nasambit nga lugar.
Suno kay Losbañes, sa Brgy. Tiza kag Brgy. 9, Roxas City nagakuha sang dalagko nga bulto sang shabu si Baltazar kun sa diin naglab-ot man sa isa ka bulan ang monitoring sang mga kapulisan.
Dugang pa sini, pagnakakuha na sang suplay ang suspek gilayon ini nga nagapauli sa iya balay nga gina-istaran sa Brgy. Parian kag ang mga kliyente na mismo ang nagapadulong diri.
Ginapahayag nga guwa-sulod ang mga pangayaw nga tawo nga nagakadto sa iya puluy-an kag ginaalegar didto man nagagamit sang iligal nga droga.
Kalabanan man sa customer ni Baltazar ang mga anay drug surrenderee nga yara sa listahan sang kapulisan.
Matandaan, narekober sa paghinakop kag kontrol sang suspek ang isa ka unit sang .38 caliber revolver nga loaded sang tatlo ka bala; black pouch nga naga-unod sang isa ka M26 fragmentation grenade; 6 ka sachets sang ginasuspetsahan shabu kag drug paraphernalia.
Ginabanta nagabug-at sang 100 gramos ang nakumpiskar nga droga kag may Standard Drug Price nga P680,000.
Ang search warrant ang gin-isyu kag ginpermahan ni Judge Judith D. Orendain-Tonogbanua, Regional Trial Court, 6th Judicial Region, Mambusao, Capiz napetsahan Pebrero 6, 2024.
Magapangatubang si Baltazar sang sampaw-sampaw nga mga kaso nga paglapas sang Republic Act 10591 ukon Comprehensive Firearms and Ammunition Regulation Act, Republic Act 9516 ukon Illegal Possession of Explosive Act of 2008 kag Republic Act 9165 ukon Comprehensive Dangerous Drugs Act of 2002.
Sa karon, nagapabilin sa kustodiya sang Sigma Municipal Police Station ang suspek para sa nagakaigo nga disposisyon. | Judy Ann Juare
