Nag-angkon sang pilas sa nawong ang isa ka lalaki matapos ginlabo sang iya kainuman sa Sitio Sibunag Ilawod, Brgy. Mianay, Sigma, Capiz takna 1:50 kaina sang kaaganhon, Pebrero 11.
Ginkilala ang biktima kay alyas Noel, 33-anyos, construction worker samtang ang ginatudlo suspek amo si alyas Albert, 31-anyos, mamumugon kag lunsay mga residente sang nasambit nga lugar.
Sandig sa imbestigasyon sang Sigma Municipal Police Station, nagainom-inom sang makahulubog nga ilimnon ang biktima kag suspek kaupod si alyas Rodel sa balay ni alyas Rosalie, ginapahayag nga hinali nalang nag-angkon sang pagbinaisay ang duha tubtob nga nagkuha sang matalom nga espading ang suspek kag ginlabo ang biktima.
Madasig naman nga gindala sa Mambusao District Hospital si alyas Noel agud dapatan sang nagakaigo nga pagbulong. Priso naman si alyas Albert sa Sigma PNP matapos nadakpan sang mga kapulisan. | Judy Ann Juare
