KABANKALAN CITY, Negros Occidental — Sa tunga sang naga-singkal nga init bangud sang epekto sang El Nino, naga-singkal man sa gihapon ang problema sang insurhensya sa probinsya.
Sa una nga bulan sang 2024, gin-pahayag ni 3rd Infantry Division public information chief Lieutenant Colonel J-Jay Javines, nga ‘dismantled’ ukon nabungkag na ang lima tanan ka guerilla fronts sang New People’s Army (NPA) sa Negros Occidental.
Ang pahayag, ang gin-sundan sang deklarasyon sang ‘state of internal peace and security’ nga nagakahulugan nga kontrolado sang kapulisan kag militar ang insurhensya sa probinsya. Apang, sang bulan sang Abril, asud-asud nga mga pagpatay ang gin-ako sang NPA nga naglambot sa walo ka mga sibilyan sa sulod lang sang isa ka bulan – gikan sa Central padulong sa Southern Negros.
Ang pagpatay, suno sang tigmaba sang NPA, ang bangud sa pag-intra sang mga ini sa mga militar sa pagkuntra sa pulang hangaway paagi sa nagkalalain nga mga programa.
Sa mga asud-asud nga pag-patay, mahambal bala nga kontrolado sa gihapon ang insurhensya kag huyang na ang mga pula? Sabat sang militar, drama nalang ini sang mga pulahan agud magtanom sang kahadlok sa mga pumuluyo sa kaumhan, para matago ang ila nagahuyang nga pwersa.
Sa piyak nga bahin, sa report sang militar sang tinalikdan nga Marso, 33 nalang ang nabilin nga NPA sa probinsya, sa rason nga nagabuhin na ini bangud sa gina-alegar naga-surrender na sa gobyerno kag nadula ang ila nga masa. Nawad-an nagid man bala sang tubig ang mga pula nga isda?