-Daina Gerona
KABANKALAN CITY, Negros Occidental –– Nalumos-patay ang isa ka menor-de-edad nga gina-alegar nabuy-an ang salbabida nga ginagamit sini samtang nagapaligo sa isa ka resort sa Sitio Calumpang, Brgy. Galicia, banwa sang Ilog, tinalikdan nga adlaw, Mayo 20.
Naga-edad sang nuwebe anyos ang biktima, isa ka lalaki nga estudyante kag residente sang Purok 8, Brgy. Talacdan, banwa sang Cauayan.
Sa pagpanghusisa sang Briagada News Team, ginhiwat sang pamilya sang biktima ang isa ka magamay nga silibrasyon sa isa ka resort sa nasambit nga lugar, apang pag-abot sang ala una nakibot na lamang ini sila nga nadula na ang amo nga bata.
Nakita na lamang sang iya nga paka-isa nga ultimo salbabida na lang ang naga-utaw-utaw sa ibabaw sang tubig, rason nga gilayon nga nagpangayo ini sang bulig sa ila mga kaupdanan, kag mismo ginikanan sang amo nga bata, apang ini ang nakit-an pagkaligad sang kapin 30 minutos nga idalum sang tubig kag wala na sang kabuhi.
Sa imbestigasyon naman sang mga kapulisan nga posible nga indi makabalo maglangoy ang bata bangud yara lamang sa manabaw nga porsyon ang nalumusan sini kag wala pa man sang may narekord nga pagkalumos sa amo nga lugar.
Nahibaluan nga gintingwa-an pa nga gindala sa Kabankalan Districk hospital ang biktima apang ini na ang gindeklara nga dead-on-arrival.*