Hustisya ro paninggitan it pamilya it 19yo nga babaye nga nasapwan nga patay eon sa may tamburong o concrete pipe sa sangka sapa sa Sitio Mangga, Torralba, Banga, Aklan.
Sa interview it Brigada News FM Kalibo kay Mrs. Olivia Rodriguez, ina it ginpatay nga si Rochell Ann Rodriguez, may una eon imaw nga ginadudahan nga suspek nga responsable sa pagkamatay it anang unga.
Nahambae eon segun nana raya sa mga pulis ag nagapadayun eon makarun ro imbestigasyun sa insidente.
Suno kay Mrs. Olivia, Biyernes it hapon kat mag eaong kana ro anang unga nga si Rochelle nga magaagto sa sangka namatyan ag bangud sa anad man imaw nga pirmeng nagapanaw raya hay owa imaw nagkahawag nga daywang adlaw eon nga owa pa nakauli ro biktima.
Pero kat pangatlong adlaw nga owa pa raya hay ginkutuban eon segun imaw hasta sa may nagbalita kana sa matuod nga natabo sa anang unga.
Owa segun nana ginaeauman nga matabo ro pagpatay sa biktima kung siin, nag angkon raya it siyam nga saksak sa eawas kara.
Nagapati si Mrs. Olivia nga posibleng gin-intresan ro anang unga bangud may witness segun nga naghambae nga nakita kara ro biktima nga sakay it motorsiklo ag may kaibahan nga daywa ka eaeaki.
Nasayuran nga may sambilog nga unga ro biktima sa dating live-in partner kara.
Nagatangis man nga ginhambae it Ina it biktima nga bago raya naghalin it andang baeay nga buhi pa hay naghakos pa it hugot kana ro anang unga ag ginhambaean pa segun imaw ni Rochelle nga raya eon ro anang ulihing pagpaligos sa anang ina bangud si Mrs. Olivia hay indi haeos makatindog bangud sa na-stroke raya. // ANN DESLENE SALAZAR
