CAMARINES NORTE- Aabot sa humigit kumulang limampung bangka ang nakilahok sa taunang prusisyon sa dagat o mas kilala sa tawag na “karakol sa bayan ng Mercedes, Camarines Norte nitong Martes, June 13 sa kapistahan ni San Antonio De Padua.
Ang bangkang sinasakyan ng imahe ni San Antonio De Padua ay napapalamutian ng mga banderitas at mga bulaklak.
Ang tradisyong ito ay matagal nang ginagawa sa naturang bayan na karamihan sa mga residente ay pangingisda ang hanapbuhay.
Bahagi ito ng kanilang pasasalamat sa Diyos sa pamamagitan ng panalangin ng kanilang patron.
Natigil lamang ang ganitong gawain noong kasagsagan ng pandemya.
Ayon sa Philippine Coast Guard wala namang naitalang anumang “untoward” incident sa pagsasagawa ng Karakol.
Samantala natagpuan naman ang wala nang buhay na katawan ng isang lalaki sa baybaying sakop ng Barangay 6 pagkatapos ng ginawang prusisyon sa dagat.
Gayunman sinabi ng PCG na hindi ito konektado sa ginawang karakol.
Pinaniniwalaang nalunod ang lalaki at habang isinusulat ang balitang ito ay inaalam pa ang pagkakakilanlan ng biktima.
