Ibinunyag ni Commission on Elections chairman Sheriff Abas na posibleng masimulan na sa susunod na linggo ang hearing sa pagitan ng dalawang paksyon ng PDP-Laban.
Sinabi ni Abas sa isang virtual press conference na hinihintay pa nila ang sagot ng Pimentel-Pacquiao wing sa reklamo ng Cusi wing para masimulan na ang hearing.
Dedesisyunan nila anya sa gagawing pagdinig kung alin sa dalawang paksyon ang ituturing na lehitimong PDP-Laban.
Mababatid na naghain ang paksyon ni Energy Secretary Alfonso Cusi ng petisyon sa poll body para ideklara bilang illegal representatives ng partido sina Senators Manny Pacquiao at Aquilino Pimentel III.
