LEGAZPI CITY – Aabot sa humigit-kumulang 5,000 ektaryang niyogan ang apektado dahil sa pag-aalburoto ng Bulkang Mayon.
Ito ang kinumpirma ni Philippine Coconut Authority (PCA) Albay Division Chief 1 Alvin Trespeces sa Brigada News FM Legazpi.
Ayon kay Trespeces, mula ito sa siyam na mga lunsod/bayan na nakapalibot sa bulkan o nasa loob ng 6 kilometers permanent danger zone na kinabibilangan ng halos 30 mga barangay.
Magiging salik umano na dapat isaalang-alang dito ay ang paraan kung paano mag-alburoto ang bulkan tulad ng kung magkakaroon ng ashfall.
Nakadepende rin kasi sa direksyon ng hangin ang magiging epekto nito sa mga niyog sa lalawigan.
Ani Trespeces, kung sakaling marami ang ilabas na mga abo at mainit-init pa, maaari itong magresulta sa tuluyang pagkamatay ng mga tanim na niyog.
Sa ngayon, aniya, nagpapatuloy pa sila sa pagtukoy ng bilang ng posibleng maapektuhang niyog o mga lupa pati na rin ang mga coconut farmers.
