LEGAZPI CITY – Maalas dose nin udto kan Disyembre 31, 2023, nagkaengkwentro an grupo nin mga kapulisan kontra sa anom na miyembros kan Conception Criminal Group (CCG) na pinangengenotan ni Gilbert Saysay Conception sa Zone 7, Sitio Parada, Brgy. Molosbolos, banwaan kan Libon, Albay.
Sa report kan mga otoridad, nagsasagibo nin intel driven operation an mga kapulisan asin tropa kan mga military sa lugar kan aldaw na ito.
Kan mapasiring sinda sa saindang payag-payag, bigla sindang pinaputukan kan CCG kaya nakipagputukan man sinda.
Nagdurar hasta singko minutos an paralitan nin putok asin makalihis ini, duminulag an CCG pasiring sa Sitio Tagbak, Brgy. Macabugos kan kaparehong banwaan.
Wara man ki nagadan sa lado kan mga pulis asin militar.
Alas kwatro man nin hapon kan iproseso kan SOCO an crime scene kun sain nakolektar an manlain-laing klase nin mga badil, mga magazine, bala, cellular phones, asin iba pang mga kagamitan sa nasambit na lugar.
