LEGAZPI CITY – Nagin matrayumpo an groundbreaking ceremony kan bagong municipal building sa banwaan kan Sto. Domingo, Albay kasuhapon.
Pinangenotan ini ni Mayor Jun Aguas kasabay sinda DOT Bicol Regional Director Herbie Aguas, DPWH Bicol Regional Director Engr. Virgilio Eduarte, asin sinda AKB Partylist Congressmen Elizaldy Co asin Atty. Jil Bongalon.
Segun sa alkalde, pupunan an pagkonstruhir kan munisipyo sa katapusan kan Nobyembre.
Nagkaigwa nin delay sa konstruksyon kaini huli ta mga binago sa plano digdi.
Pighahalat na sana an iba pang mga resikitos asin bidding tanganing mapunan na an konstruksyon kan edipisyo.
Dugang pa kaini, direkta nang ibababa sa lokal na gobyerno an pondo tanganing maparekas an pagkonstruhir.
Segun pa kay Aguas, moderno an disenyo kan bagong building asin an nagkapirang old buildings gigibohon na museyo.
Segun man kay Engr. Eduarte, nagkakantidad na PHP210M an kantidad kan itutugdok na edipisyo.
Mientrastanto, bilog man su boot an suporta kan nasambit na partylist sa proyekto orog na ta an mga residente kan banwaan an mabenepisyo digdi.
Kun magigiromduman, Nobyembre 13 kan nakalihis na taon kan masulo an munisipyo sa nasambit na banwaan.
