TANGGONG na sa presinto sa Polomolok, South Cotabato si alyas John, grade 12 student human napalitan og gidiling droga sa otoridad, dungan sa gikasa nga anti- illegal drugs operation.
Sa impormasyon sa Polomolok Municipal Police Station, napalitan si alyas John og pinaugang dahon sa marijuana sa drug buy bust operation sa Purok Maligaya 1, Barangay Pagalungan sa nasangpit nga munisipalidad, nakalabay nga adlaw.
Naimbargo sa dinakpan human ang operasyon, mao ang usa ka putos sa gituohang pinaugang dahon sa marijuana nga nagkantidad og P120.00. Giandam na karon sa otoridad ang kasong pagsupak sa Republic Act 9165 o Comprehensive Dangerous Drugs Act of 9165 batok sa dinakpan.
Una nang, gibutyag ni Police Lt. Col John Rick Medel, hepe sa presinto sa lugar nga hugot ang kampanya nila kauban ang Philippine Drug Enforcement Agency (PDEA) 12 batok iligal nga droga sa lugar. I Richel Gubalani