TANGGONG na sa selda sa presinto sa kapulisan sa Sarangani Province ug GenSan ang duha katao nga nasikop sa bulag nga operasyon.
Sa Malungon Municipal Police, nasikop nila ang usa ka mag-uuma nga gitudlong mipatay sa usa ka lalaki sa Sitio Tribal, Barangay Pito, Malalag, Davao del Sur.
Giila ni PLt Col. Geovanni Ladeo, hepe sa presinto ang dinakpan nga si alyas San, wala usab girekomenda nga pyansa ang korte sa kaso. Samtang balhog na sa selda sa Lagao Police Station si alyas Jul, hamtong ang panuigon, nagpuyo sa Barangay Lagao.
Human gisilbi sa sakop sa presinto ang warrant of arrest sa batok kang alyas Jul sa kasong pagpanglugos.
Sa pamahayag ni Police Major Ari Noel Cardos, hepe sa presinto nga ang pagkasikop ni alyas Jul ang gumikan sa pakigtinabangay sa katawhan sa publiko. I Richel Gubalani
