Dako ang pagpasalamat sang mga ginikanan ukon guardian sang mga kabataan nga lalaki sa programa sang Brigada News FM nga Brigada Operation Tuli kag may tema “Kaisog kag pagkalalaki, ipadayon” nga ginlunsar sa Brgy. Culasi, Roxas City sang tinalikdan nga Sabado, Hulyo 29.
Sa interview sang Brigada News FM Roxas City kay Nanay Elsa Lago, residente sang Brgy. Bolo sining syudad, iya ginpahayag nga tuman gid ang ila pagpasalamat sa Brigada News FM bangud sa paglunsar sang libre nga tuli para sa mga kabataan nga lalaki kag suno pa diri alas 6 palang sang aga nagpadulong na sila sa Culasi agud magpila.
Suno naman kay nanay Inday, nanugon siya sa oportunidad bangud ang iya bata ang isa sa mga gin-denied bangud ini ang alangon pa nga ipaidalom sa operation tuli. Nahibaluan nga naglab-ot sa 200 ka mga kabataan gikan sa nagkalain-lain nga kabarangayan ang nagpalista apang 125 lamang diri ang nagmadinalag-on nga maserkom bangud ang iban sa ila ang alangon pa.
Ginpahayag ni Dr. Venus Loretizo, Capiz Hospital Management Unit head, nga dapat naga-edad sang 12 pataas kag may bug-at nga 30 kilos pataas ang ang pwedi nga mapaidalom sa operation tuli.
Ang Brigada Operation Tuli ang tuigan nga aktibidad sang Brigada News FM kaupod ang gintingub nga pwersa sang One Tahanan, Brigada Foundation Inc., agud makahatag sang serbisyo sa mga pumuluyo nga may yara sang Brigada News FM Station.
Kabulig sang Brigada News FM Roxas City, Capiz ang Medical team ni Governor Fredenil Castro nga “Gugma Medical Team” nga ginakabug-usan sang mga doktor kag nurses gikan sa Bailan, Tapaz, Dao kag Mambusao District Hospital upod man ang mga Barangay Officials kag BHW sang Brgy. Culasi. | Judy Ann Juare
