Mabinungahon ang paghiwat sa probinsya sang Capiz sang labing una nga Capiztahan Indigenous Peoples (IP) Day nga gin-organisar sang gobyerno probinsyal sang Capiz pinaagi sa talatapan ni Indigenous People Mandatory Representative (IPMR) Rafe Laluma sa Capiz Villareal Stadium, Poolside kahapon nga adlaw sang Biyernes, Abril 28.
Dire nagtipon ang ginatos nga mga Panay Bukidnon kag Ati ICCS/IPs nga Capisnon kag ginpasundayag ang ila manggad nga kultura kag tradisyon sa mga dinapit nga bisita kag mga estudyante nagikan sa nagkatuhay nga buluthuan sa probinsya.
Pila sa ginpakita amo ang ila mga tradisyonal nga saot, Pagdaha Ka Mga Dinuma-an nga Dapli, Paigma/Hemangin, Dungog Musika, Pahampuro (Dinum- an nga Hampang) kag madamo pa.
Ginkalipay naman ni Governor Fredenil H. Castro nga makita dire ang mga katigulangan kag kabataan nga netibong Capisnon.
Suno sa iya nga sila nga mga IP’s ang wala kinalain sa iban bangud palareho lamang kita kag sila ang manggad sang pungsod kag probinsya.
Gindugang pa sang gobernador nga ang probinsyal nga pagdumalahan wala nagakatulog kag damo may gina plano para sa ila isa na dire ang ila nga pangabuy-anan.
Ginsiling pa ni Gov. Castro nga sa tanan nga adlaw siya ang may balatyagon kag ginahiguma sila nga mga Indigenous People.
Nangin dinapit man nga bisita dire ang Sangguniang Panlalawigan Members nga ginapangunahan ni Vice Governor James Mitang Magbanua, Regional Director, NCIP Region6 kag 7, Ms. Ana M. Burgos kag CDO III, Head, NCIP Capiz Community Service Center, Ms. Rubie Capada.