PAGPASALAMAT ang pulong nga gibalik-balik sa mga ginang nga natunolan og tabang sa mga miyembro sa Kabrigadahan.
Matud ni Vilma Maturan, 45-anyos, biyuda, taga Purok Changco 2-B, Barangay Seguil, GenSan luyo sa kahadlok nga mawad-an og trabaho isip tigsilhig sa barangay.
Misaka siya sa ‘stage’ atol sa pag-imbita sa pamilyang Achievement with Integrity Movement (AIM) sa pagpanguna ni Brigada Elmer V. Catulpos aron personal nga makapasalamat.
Human nahimong tulay ang tambayayong sa miyembro sa kabrigadahan aron matubag ang mga panginahanglan sa pagsakit ug pagkamatay sa mister atong Nobyembre 2021.
“Pasalamat ko sa Brigadahan- GenSan, kay niadto ko didto gitabangan dayon ko, pag-ingon nila adtoon ko nila anang orasa, niadto sila atong akong gipuy-an nga gamay kaayo nga payag, gitagaan me og wheelchair, grocery ug kwarta hangtud na-miyembro ming tanang sa brigadahan, hangtud nga namatay akong bana mitabang gihapon,” asoy ni Maturan.
Samtang, gidayeg ni Norisa Esquirra, taga Upper Acharon, Barangay Calumpang human nanawagan ug natabangan siya sa pagkamatay sa iyang anak.
Nakita niya ang gilayong tabang sa mga miyembro sa kabrigadahan tungod sa maayong pagdumala ni Brigada Elmer.
“Natabangan ko sa mortuary sa akong anak, nindot ang pagtukod ni sir Elmer sa kabrigadahan kay naa ang tinabangay sa mga miyembro, tungod nakita nako ang kaayohan nag-volunteer ko maging C.O,” butyag ni Esguirra. Nanawagan ang mga nasangpit ngadto sa mga dili pa miyembro nga makaya ang tanan kung dunay pagtinabangay sa matag-usa nga maoy tumong ug tuyo sa kabrigadahan.
