-Arra Roquero
KABANKALAN CITY, Negros Occidental — Naka-agum sang pilas ang isa ka manugpangisda matapos ginbuno sang isa ka persona bangud sa gina-alegar pagpanglibak sa Purok Mainuswagon, Brgy. Zone-1, Pulupandan, alas 9:30 sang gab-e, Augusto 14, 2024.
Sandig sa report sang Pulupandan Municipal Police Station, ang biktima ang ginkilala sa kay alyas “Jessie” 46 years old, lalaki, kag kasado. Samtang, ang suspek naman ang ginkilala sa kay alyas “Ollan”, isa ka lalaki, 24 anyos, sultero, wala sang obra kag lunsay mga residente sa nasambit nga lugar.
Sa imbistigasyon sang kapulisan, samtang nagainom-inom ang biktima kaupod ang iya abyan sa sulod sang ila puluy-an, hinali nalang nagsulod ang suspek kag ginkompronta ang biktima sa alegasyon nga pagpanglibak, kag diri na nagluntad ang pagbinaisanay.
Gilayon naman ini nga ginsaway sang ila mga himata apang matapos ang pila ka minutos, nagbalik ang suspek kag ginbuno ang biktima sa likod.
Nagpalagyo si Ollan matapos ang insidente, kag si Jessie naman ang gindala sa Rural Health Unit para mahatagan sang nagakaigo nga pagbulong.*
