KABANKALAN CITY, Negros Occidental — Naga amat-amat na lapuyot ang dalagan sang politika sa diin man nga bahin sang pungsod Pilipinas, samtang naga-pahilapit na ang 2025 midterm and local elections.
Angut diri, nag lupok man ang isa ka alegasyon nga may yara sang naga-luntad nga ‘mass transfer’ ukon ang madamuan nga pag-saylo sang botante gikan sa pipila ka barangay sang banwa sang Ilog kag syudad sang Himamaylan, padulong sa Barangay Binicuil sa syudad naman sang Kabankalan.
Sa interview sang Brigada News FM-Kabankalan kay Punong Barangay Sonny T. Garsolao sang Binicuil, iya ginpanginwala ang alegasyon, kag suno sa iya, may yara na daan sang mga butante ang Barangay nga na-sitwar ang mga puluy-an sa boundary sang syudad sang Himamaylan kag Kabankalan nga amo ang Barangay Suay, apang sa iya barangay naga-butar ang mga ini bangud mas malapit ini kun e-kumparar magkadto pa ini sa poblacion sang Su-ay.
Kun ang mga botante sang nasambit nga barangay nga yara naga estar sa boundary sang Himamaylan kag Kabankalan ang paga-estoryahan, Suno kay Garsolao Indi maglapaw sa 50 ka botante lamang ang yara naga-estar diri kag tinuig na ang mga ini naga butar sa Binicuil.
Dugang pa sang punong barangay, sang April 25, sa diin nagpatigayon ang COMELEC-Kabankalan sang registration sa ila Barangay, aminado ini nga may yara kuntani maga transfer gikan sa Barangay Hilamonan padulong sa Binicuil, apang wala ini gin-aprobahan sang ahensya.
Ang nasambit nga alegasyon ang nag-guwa tatlo kabulan sumugod nga nag-umpisa ang voters registration sang Commission on Elections sa pungsod. Madumduman nga ang voter’s registration ang magapadayon asta Setyembre 30, 2024.*