PUNTING sa local government unit (LGU) sa GenSan nga matubag ang problema sa housing backlogs. Gamit ang city government local shelter plan, nakig-alayon ang LGU sa mga homegrown firm alang sa punting nga makab-ot ang ‘zero’ housing backlogs.
Sa datus sa City Housing and Land Management Office (CHLMO), naa sa 7,900 ang housing backlogs sa GenSan. Lakip sa listahan ang homeless, informal settlers ug katong dunay mga trabaho apan dili makaya sa pagpahimo og balay.
Matud ni Engr. Ronald Nuñeza, labaw sa CHLMO daghan nang informal settlers nga ila nang na-relocate partikular na katong naa sa critical zone ug apektado sa mga infrastructure program sa gobyerno.
Gawas niini, giangkon sa opisyal nga usa sa ilang problema sa pagpangeta og relocation site mao ang land conflicts.
Apan dunay mga lihok nga gihimo sumala pa ang LGU kalabut sa maong hisgotanan.
Ang housing program sa LGU ang kabahin sa poverty program sa LGU, butyag ni Nuñeza. Punting sa programa ang mga low-income families ug informal settlers nga nagpuyo sa mga critical zones. I Richel Gubalani
