MIABOT og tulo ka oras ang diskusyon sa mga konsehal ug mga naa sa ehekutibo sa pagpailawom sa GenSan sa General Community Quarantine (GCQ).
Una nang, gikwestyon ni Konsehal Franklin Gacal Jr., ang legalidad sa pagpatuman niini tungod wala kini miagi sa proseso. Pinakalit usab ang pagpatuman niini nga miresulta sa panic buying sa mga tawo ug daghan ang naapektohan.
Matud niini, ilawom sa GCQ wala gibawal ang dine-in sa mga kan-anan ug sa religious activity apan kini ang angayang limitahan. Sukwahi kini sa napatik sa Executive Order (EO) no. 25 asa bawal ang dine-in sa mga restaurant. Migula usab nga morag ‘prank’ ang nahitabo human gibakwi ang pipila sa napatik sa EO no.26 ug nagpagawas og EO.26 nga mas luag na.
Gikwestyon usab ni Konsehal Dominador Lagare Jr., ang wala matud pa pagpaminaw sa ehekutibo sa singgit sa mga doktor dihang girekomenda sa mga nasangpit nga inay GCQ, 14 kaadlaw na lang nga lockdown ang ipatuman aron pugngan ang pagsaka sa kaso sa COVID-19.
Gihingusgan ni Atty. Arnel Zapatos, city administrator gibalanse nila ang gihimong desisyon ug gikonsulta ang tanan bag-o gipagula ang EO. 25. Sa mga pangutana sa mga konsehal halos na makahilak si Zapatos dungan sa iyang pagpasabot sa nahimo nilang desisyon. (Richel Gubalani)
