ADUNA nay gitudlo si Cebu City Mayor Michael Rama nga modumala sa mga environmental concerns sa siyudad.
Napili niya si kanhi Department of Environment and Natural Resources (DENR) Secretary Roy Cimatu nga mhimong kabahin sa iyang management team isip membro sa City Advisory Board.
Si Cerwin Eviota, Cebu City information officer, niingon nga si Cimatu maoy magsilbing adviser sa nagkadaiyang programa sama sa “Gubat sa Baha” program, nga nagtinguha nga matubag ang problema sa nasinating mga pagbaha sa dakbayan.
Lakip na ‘sab niini ang pagpatuman sa three-meter easement sa katubigan sa dakbayan.
Kahinumduman nga niadtong Hulyo 2022, gipaila-ila ni Rama si retired Philippine National Police (PNP) chief General Debold Sinas isip chairman sa Cebu City Police Advisory Council ngadto sa mga empleyado sa City Hall ug mga department head human niini gidawat ang tanyag sa Mayor.
Giingong kung nahimo ni Cimatu ang rehabilitation sa Boracay, Manila Bay, Pasig og Marikina, dako ang pagtuo ni Rama nga kaya usab ni Cimatu nga panguluhan ang recovery og ang rehabilitation sa tanang mga sapa, waterways og coastlines sa syudad.
