Gihimakak sa Brgy Council sa Brgy Bunawan Proper ning syudad ang pasangil nga matod pa gikunsumo nila ang nasakmit nga mga isda ug gulay gikan sa mga side-walk vendors nga nasikop atol sa Road Clearing Operation.
Nunot kini sa Facebook post sa anak sa usa sa mga vendor nga gidakop sa taga Barangay sa may Villa Rosa St human nakalapas matod pa sa dalan.
Ang maong post, nakaani og nagkadaiyang reaksyon ug sagad sa mga pangutana kung asa gidala ang nakumpiskang mga isda. Sa pagpanubay sa Brigada, gitubag kini ni Kagawad Jun Giray sa Brgy Bunawan sa Brigada nga dili tinuod ang pasangil nga migula sa social media nga gikunsumo matod nila ang mga isda nga nakumpiska gikan sa mga vendor.
Apan giklaro niini nga gi-donate matod nila sa Bahay Dangupan ug Home for the Agent ang mga isda.
Dugang butyag ni Kagawad Giray nga wala matod sila nagkulang og pagpahibalo ngadto sa mga vendors nga bawal maglaray sa nahisgutang dapit, gani gihatagan pa nila og duha ka semana ang mga nahisgutan.
Hinuon nagka settle na sa Brgy ang mga dinakpan ug Brgy council ug gihatagan na sila og pwesto kung asa pwede makabaligya.
