KABANKALAN CIY, Negros Occidental — Halos isa na ka-tuig ang nakaligad, wala sa giyapon na napamatbatan ang mga suspetsado nga nagpatay sa mag-asawa nga Roly kag Emilda Fausto, kag duwa sini ka menor de edad nga bata nga sanday Ben kag Raben, sang gab-i sang Hunyo 14, 2023, sa Sitio Kangkiling, Barangay Buenavista, syudad sang Himamaylan.
Sa interview sang Brigada News FM-Kabankalan kay Police Captain Arturo Margallo, Jr., deputy chief of police sang Himamaylan City Police Station, wala pa na file ang apat tanan ka kaso sang murder batok sa gina-tudlo nga suspetsado sang isa ka witness sang kapulisan.
Suno kay Margallo, may napasaka na sila nga ‘grave coercion’ nga kaso batok sa isa ka suspetsado nga si Fernando Herminio, apang ang kaso nga murder, nagapabilin nga dokumento bangud gina-hulat pa nila ang mga nabilin nga bata sang mag-asawa amo ang mag file sang kaso, nga sa karun, gina-alegar wala na naga-kooperar sa kapulisan.
Madumduman, nga ginabasol sang mga kapulisan kag militar ang pag-massacre sa mga miyembro sang New People’s Army, sa alegasyon nga gina-initan ang padre de pamilya nga si Roly, bangud gina-alegar nagabulig ini sa pag pa-surrender sang pamilya sang iya umagad nga gina-patihan aktibo sa hublag.
Samtang, ginpanginwala sang NPA ang alegasyon kag ginabasol naman ang 94th Infantry Battalion sa pag-patay bangud sa gina-alegar pagpati sini nga ang pamilya miyembro sang pulang hangaway.
Ginpanginwala man sa kamagulangan nga bata sang mag-asawa nga si Emily, ang alegasyon nga isa ka asset sang militar ang ila amay.*