Nataban sang isa ka traysikol drayber ang bag sang estudyante nga pasahero matapos ginaalegar gin-holdap sini sa Brgy. Culasi, Roxas City takna alas 11:00 kahapon sang udto, Lunes, Pebrero 26.
Ginkilala ang biktima kay Grace Funa, 19-anyos kag residente sang Andrada Subd., Brgy. Banica samtang ang ginatudlo suspek amo si Jorin Firmo, yara sa legal nga pang-edaron kag residente naman sang Brgy. Dumulog sining syudad.
Sandig sa ginpa-record sang biktima sa Roxas Component City Police Station, nagsakay siya sa traysikol sang suspek halin sa Banica road padulong sa Andrada Subdivision.
Ginapahayag nga antes paman siya nagsakay may yara na sang pasahero ang suspek kun sa diin nanaog ini sa New road sa nasambit nga barangay.
Dugang pa sini, liwat nga nagmaneho ang suspek apang ini ang nadaretso sa Brgy. Dumulog.
Nagpakitluoy ang biktima sa suspek nga magpondo apang ini ang wala nagpamati tubtob nga nakalab-ot sila sa Brgy. Culasi kag didto na siya gintutukan sang suspek sang matalom nga hinganiban kag ginkuha ang iya bag nga naga-unod sang laptop kag accounting books.
Madasig naman nga nagpalagyo ang suspek padulong sa Brgy. Libas kag nabilin ang estudyante sa lugar nga gintabuan sang insidente.
Sa karon, yara na sa kustodiya sang Roxas City PNP ang suspek matapos nadakpan sang mga kapulisan sa ginpatigayon nga hot pursuit operation. | Judy Ann Juare
