Moabot pa sa kapin usa ka gatos ka eskwelahan sa Davao Region ang posibleng magpatuman og face-to-face nga modality sa klase.
Sumala kang Jenelito “Dodong” Atillo, ang tigpamaba sa DepEd XI, karon anaa na sa kapin 60 ka tulunghaan ang padayong nagpahigayon og face-to-face alang sa pilot implementation ug laumang moabot pa kini og 111 karong bulan sa Marso alang sa expanded pilot implementation.
Usa sa nakapaaghat sa ubang eskwelahan sa paglusad og in-person classes mao ang maayong sitwasyon sa mga lugar nga ubos lang ang kaso sa virus, lakip ang paghatag og pagtugot sa mga ginikanan ug Local Governent Units.
Hinoon gitino sa opisyal nga muagi pa sa makuting proseso sa DepEd-XI ang rekomendasyon sa schools division alang sa mga eskwelahan nga nag-apply kung angayan na ba nga tugutan ang pagpahigayon og face-to-face classes.
Dinhi sa Davao City, subay sa Executive Order (EO) No. 9 Series of 2022 nga gipagula sa City Government of Davao, mamahimo na nga maka-apply alang sa F2F classes ang private ug public schools gikan Kindergarten hangtud sa Post-Graduate Studies.
