-Reymund Titong
KABANKALAN CITY, Negros Occidental — Hilway sa ‘cyber security threats’ ang Electronic Business One Stop Shop (eBoss) application sang gobyerno nga ginagamit na sa karun sang syudad sang Himamaylan.
Sa interview sang Brigada News FM Kabankalan kay Department of Information and Communication Technology (DICT) region 6 director Ralph Moncatar, iya ginpahayag nga ang ahensya ang may cyber security bureau nga regular nagapatigayon sang assessment sa nasambit nga application.
Dugang pa ni Moncatar, ang eBOSS application ang may yara man sang feature nga audit trail, sa diin nagaka-monitor ang mga persona nga naga log-in sa system, kag naga-automatic man ini nga naga ka-expire ang kada session, agud malikawan ang hijacking.
READ: Syudad sang Himamaylan, labing una nga LGU sa probinsya nga may eBOSS system
May yara man suno sa director sang mabaskog nga password policy, agud ma sekyar nga ang mga otorisado lamang nga mga persona ang maka-gamit sang aplikasyon.
Ang eBOSS ang isa ka online portal nga pwede magamit sang mga kliyente sang syudad agud magkuha sang ila business permits ukon sa sa pag-rehistro man sang ila mga negosyo, nga may tinutuyo nga mapahapos kag mangin masulhay ang mga transaksyunes sa gobyerno.
Madumduman nga ang syudad sang Himamaylan ang labing una nga local government unit (LGU) sa Negros Occidental nga naga gambit sang eBoss.*
