PATAY ang usa ka manager sa bangko sa pagpamusil alas 6:30 sa gabi-i adlawng Lunes, sa Leon Llido Street Brgy.Lagao. Giila sa kapulisan ang biktima nga si Peter Tiang Salvador, 39-anyos, manager sa Philippines Business Bank, residente sa Blk.3, Agan Grandville, City Heights,GenSan.
Sumala sa nakasaksi nga si Alyas Khael trabahante sa kan-anan dool sa nahisgotang lugar nakita niya nga gipa-ulanan og bala ang sakyanan sa biktima ug aduna pay basiyo sa bala nga nalagpot sailang dool kung asa natapsingan ang ilang customer nga si Christian Lauron.
Pagkahuman niini ang biktima nga si Salvador nakaabot pa sa unahan nga bahin gihapon sa Leon Llido street ug didto na kini gipusil sa daghang higayon sa wala mailhing mga suspek sakay sa usa ka motorsiklo.
Nadala sa Dr.Jorge P.Royeca Hospital ang biktima apan gideklara nga DOA ni Dr. Rodriguez tungod sa mga igo nga naangkon niini sa iyang lawas.
Samtang pagka-alas 7:20 susamang kagab-ihon naigo usab sa pagpamusil ang usa ka trisikad driver atbang sa Agan Southvillas Barangay Lagao. Naila kini kang Adonis Culongan Bercero, 34-anyos, adunay live in partner, taga Prk 6, Pioneer Village, Brgy Lagao.
Gikataho sa Police station 3 nga ang nasangpit nga biktima naglabigar sa Digos-Makar road sakay sa iyang sikad ug pag-abot atbang sa naasoy nga subdivision nakadungog kini og buto sa armas ug namatikdan na lamang niini nga aduna na siyay igo pinusilan sa iyang ulo ug nagkadugo.
Gilayong miresponde ang otoridad ug gidala sa Socksargen Hospital si Bercero. Nasayran nga adunay duha ka igo pinusilan sa ulo ang biktima ug gibutyag sa kapulisan nga anaa na kini sa maayong kahimtang
Sa karon ginasuta kung may koneksyon ang pagpamusil kang Peter Tiang Salvador sa pagpamusil usab kang Adonis Bercero nga halos minuto lang ang gintang sa magkasunod nga pagpamusil nga natala sa AOR sa Lagao Police station. I Enamie Mogpon
Photo: Ronda Brigada – Brigada News TV
