MIAGAY na ang mga mananagat sa Gensan tungod sa walay puas nga pagtaas sa presyo sa produktong petrolyo.
Sumala pa ni Ruel Libawan usa sa mga miyembro sa Minanga Fishermen Association na halos dili na sila makabawi sa ilang pang-adlaw adlaw nga panginabuhian tungod sa gasolina nalang maadto ang ilang income sa pagpanagat.
Dugang pa niini nga kung ikompara ang ilang sitwasyon nakalabay nga tuig mas nisamot pa ang ilang naglisud sa kasamtangan ilabi nga aduna na usab pagtaas sa presyo sa produktong petrolyo karong semana.
Miapila usab ang mga nahigustang mananagat sa national government nga himuan og pamaagi aron makabalik na sila sa normal nga sitwasyon.
Nanawagan usab sila sa sektor sa agrikultura nga ihatag na ang gisaad nga subsidiya gikan sa gobyerno.
Una nang gibutyag ni Dominic Salazar, ang presidente sa Socsksargen Federation of Fishing and Allied Industries Inc. (SFFAII) nga ila nang gihangyo sa gobyerno nga isuspende ang value-added tax ug excise tax nga nagpalisud sa ilang sektor.
Apan hangtod karon pending pa gihapon kini og galaom gihapon silang mahatagan na kini og pagtagad sa pagsulod sa bag-ong administrasyon ni President- elect Ferdinand Bongbong Marcos Jr. I MJ Fernandez
