Kasong Reckless Imprudence Resulting in Homicide ug Serious Physical Injury ang kasong gipasaka batok sa driver sa Prime Mover Truck nga nakaligis sa duha ka babaye diin usa niini ang patay.
Sa inisyal nga imbestigasyon sa Bunawan PNP alas- 10:13 sa buntag kagahapon, Oktubre 25, 2023, gisubay sa truck ang Km.23 A1 Bud-bud, Bunawan Davao City.
Pag abot sa lugar diin nahitabo ang aksidente, nabanggaan sa truck nga gimaneho ni Jemvar Cantila Melendres, 40, nga residente sa P6 Pisian Ilang ning syudad ang duha ka mga babaye nga nailang sila Anafe Salgado, 42, nga taga-Prk. 4 Cal Village Tibungco, ug Geralen M. Nuñez, 36, residente sa Prk.7-B Inabangga, Bunawan Davao City.
Sumala pa nga patabok ang duha ka biktima sa lugar ug aksidenteng nabanggaan, ug sumala pa nalatayan ang usa sa mga biktima nga diha-diha dayon namatay nga si Salgado samtang gidala sa Southern Philippines Medical Center si Nuñez.
Gidala na sa Rivera Funeral Homes sa Lasang ning syudad ang patay’ng lawas ni Salgado samtang ang driver gikustodiya sa Bunawan Police Station lakip na ang truck nga gimaneho niini.
