GIMUGNA ang Special Investigation Task Group (SITG) sa pagpusil-patay sa Brgy. Kagawad ug aspirant Barangay Captain sa Barangay Camantangan sa Montevista Davao de Oro nga si Alvin Bengil Garcia.
Kini human sa gihimong panagpulong kagahapong adlawa, Oktubre 25 sa mga personahe sa Davao de Oro Police Provincial Office uban sa giya ni PBGen. Alden B Delvo.
Ang panagpulong gipangunahan ni PCol. Rolindo M. Suguilon, Deputy Regional Director for Operations sa tumong nga mapaladman pa ang imbestigasyon alang sa dinaliang kasulbaran sa maong kaso, ug aron usab nga mailhan na ang suspek ug mapanubag sa balaud ang nagpaluyo sa maong krimen.
Nanawagan sab ang lokal nga kapulisan sa publiko nga mahimong makig-alayon sa otoridad aron nga maangkon na sa biktima ug sa iyang pamilya ang hustisya.
Kahibaloan nga si Garcia, anaa atong tungora sa Purok 4 sa nasangpit nga barangay uban sa kauban nga aspirant Barangay Kagawad usab nga si Jocelyn Montaño Agron, aron i-anunsyo nga magpahigayon sila og “Pulong-pulong” alas 4:00 sa hapon anang adlawa, Oktubre 24.
Apan sa dihang pauli na ang mga biktima sa Camantangan proper sakay sa gimanihoang motorsiklo ni Garcia, kalit nalang silang giduol sa duha ka suspek nga naka motorcycle-riding in tandem ug didto gipusil si Garcia.
Nadala pa sa DDO-Provincial Hospital ang biktima apan gideklarang dead on arrival tungod sa nahiagomang pinusilan sa ulo; samtang ang 50-anyos nga iyang backride nga si Agron nakahiagom og minor injuries nga nakagawas na usab gikan sa ospital.
Samtang, hugot sab nga gikondena ni Montevista Municipal Mayor Cyrex Basalo ang kamatayon sa iyang kaubanan ug higala.
Sa opisyal nga pamahayag nga gipagawas sa lokal nga panggamhanan, gikasubo sa Mayor ang maong krimin ug nagpaabot usab kini og pahasubo ngadto sa pamilyang Garcia ug sa Barangay Camantangan.
Gipanaad sab sa Mayor nga papaspasan niini ang pagkab-ot sa hustisya alang kang Kagawad Garcia ug subay niini gimandoan na usab sa opisyal ang kapulisan ug kasundalohan alang sa hingpit nga imbestigasyon labot sa mga responsable sa maong krimen.
