LAING dugang suplay sa mga bakuna ang niabot sa Gensan gikan sa National IATF alang sa massive vaccination.
Sa kumpermasyon ni City Administrator Atty. Arnel Zapatos ang ulahing niabot nga bakuna batok COVID-19 mokabat sa 11,000 doses nga Sinovac, aduna usab niabot nga 22,000 doses sa Moderna ug may laing 30,000 nga Sinovac.
Ang mga bakuna makatag sa tulo ka dagkung area sa mass vaccination sa Robinsons Mall, Veranza ug sa SM Mall, ang uban maadto sa mga Rural Health Units.
Subay sa datus niabot na sa kapin 120,000 ka mga tawo ang nabakunahan sa Gensan, ang target aron makab-ot ang herd immunity anaa sa 476,000 ka mga tawo nga 70 percent sa population sa Gensan.
Padayon ang vaccination sa A-1 hangtud A-3 nga gilangkuban sa medical frontliners, senior citizens ug adult with comorbidities.
Samtang gipalapdan na usab karon sa A-4 gumikan daku kini nga porsyento sa populasyon.
Gidugang ni Zapatos nga kon walay mga kakulian sa suplay sa bulan sa Nobyembre makab-ot na ang herd immunity.
Tungod niini nagapasalamat si Zapatos sa tabang sa nasyunal sa pagsuplay sa bakuna, sa mga health workers ug mga doctor nga nagatrabaho sa vaccination sites. ( Ever Diazon)
File Photo: LGU-Gensan
