Nagtagbo ang mga miyembro sa Motorized Tricycle Franchising and Regulatory Board kon MTFRB ug usa sa giduso sa representante sa tricycle federation mao ang kausaban sa pamasahe sa yellow plate nga tricycle sa tulo ka cluster.
Sa kumpermasyon sa pangulo sa pula nga cluster sa tricycle nga si Joshue Fernandez sumala niini nga usa sa ilang giduso mao ang kausaban sa pamasahe gumikan dugay na nga wala mausab ug walay kalamboan sa ilang dugay na nga giduso nga usbaw.
Gidugang ni Fernandez nga nagapasibaw ang ilang mga sakop nga may prangkisa nga pigado gayod ang ilang pag pamasada kay tulo lang ka pasahero ang gitugot samtang wala may kausaban sa pasahe, wala usab klarong basihan mao nga giduso nila ang saktong tarifa.
Ang gisugyot sa tricycle federation 15 pesos sa unang upat ka kilometros unya 2 Pesos sa mosunod nga kilometro ug malaumon sila nga ma- aprubahan ang ilang sugyot human nga na-aprubahan matud pa sa MTFRB Board.
Samtang ang pasiunang reaksyon sa pipila ka sumasakay sa sugyot sumala kay Nilo Java nga taga Habitat nakasabot daw siya sa sentimento sa mga tricycle drivers kay nakita usab niya ang aktwal nga sitwasyon sa mga driver,usahay daw kon walay barya wala na niya ginakuha tabang nalang daw sa driver.
Samtang ang komento sa usa ka konsehal sa Barangay Bawing nga si Harold Tare aduna siyay pagsupak sa usbaw sa pasahe sa tricycle.
Ang rason niini mas daghan ang na-apektuhan nga trabahante sa pandemya, daghan ang nawad-an og panarbaho mao nga mas lisod ang sitwasyon kon motaas ang pamasahe.
Apan mo-uyon siya sa fare increase kon mabalik na sa normal ang sitwasyon ug mawala na ang pandemya, sa ilaha daw nga barangay padulong sa downtown area anaa na sa P60 pesos gikan sa P30 pesos sa wala pa ang pandemya apan gisabot lang sa mga pasahero tungod limitado ang mosakay, mao nga gisugyot niini nga human sa pandemya nalang ang fare increase. ( Ever Diazon)
