Gisubay na sa City Health Office sa Cagayan de Oro ang natala nga dugang 8 ka kaso sa COVID-19 Delta variant sa syudad.
Matud ni City Mayor Oscar Moreno nga bisan og certified recovered na ang 8 ka pasyente, gitun-an pa gihapon karon ang pagpa-ilawom sa local focus containment sa lugar kung asa natala ang maong kaso.
Nasayran nga gilangkuban kini sa usa ka pamilya sa Balulang diin dunay 7 ka indibidwal ang positibo sa Delta variant ug usa ang natala sa brgy. Canitoan.
Sigun sa CHO nga nakarekober niadtong July 15 ang entiro pamilya sa Balulang, samtang niadtong July 18, nakarekober sab ang usa ka indibidwal nga positibo sa Delta sa brgy. Canitoan.
Subay niini gi-ingon ni CHO Acting City Health Officer Dr. William Bernardo nga gipalapdan nila karon ang contact tracing.
Sa karon, muabot na sa 13 ka kaso sa Delta variant ang natala sa Cagayan de Oro.
(Anaa sa picture/ Mayor Moreno atol sa gihimo nga kompirmasyon sa dugang Delta variant cases sa CDO)
