MIABOT kagahapon ang dugang 4,965 vials sa Sinovac vaccine sa COVID-19 Vaccine Command Center, Lagao Gymnasium nga gihatod sa Department of Health o DOH-12.
Segun kang NIP Coordinator Dr. April Mae Maquilang, ang 3,500 vials ang alang sa first dose ug 1,465 ka vials usab ang alang sa second dose sa nahibiling mga Priority Groups A1 kun Healthcare Workers, A2 kun Senior Citizens ug A3 kun Adults with Comorbidities.
Ipang-apod apod usab ang 3,500 Sinovac vials, asa modawat matud pa og tag-250 vials ang mga barangay nga lakip sa Pareto Diagram kung asa may taas nga kaso sa COVID-19.
Kini mao ang Brgy. Katangawan, Lagao, Bula, Mabuhay, San Isidro, City Heights, Apopong, Labangal, Calumpang, ug Fatima.
Tag-220 vials usab matud pa ang ihatag sa Brgy. Baluan, West ug Tambler vaccination sites.
Samtang, ang 590 vials usab ang alang sa nahibiling PNP healthcare workers, LGU employees nga may comorbidities ug mga newly-hired healthcare workers sa mga ospital.
