Haeos balik eon segun sa normal ro pagpangabuhi it mga pumueuyo sa Dubai.
Raya hay base sa pahayag it sangka Aklanon worker nga na-interview it Brigada News FM Kalibo.
Naghinyo man raya nga indi eon imaw paghingaeanan.
Sa makarun hay balik operasyon eon segun ro haeos tanan nga commercial establishments sa Dubai, ro importante hay may suksok nga face mask ag ginapatuman ro social distancing.
Owa man segun it curfew makarun sa Dubai ag maabo eonman ro nabakunahan nga mga pumueuyo pati sanda nga mga workers.
Libre man segun para kandang mga workers ro hospitalization bangud covered sanda it insurance ku andang mga employer.
Insigida man segun nga nagatao it ayuda ro gobyerno sa Dubai kung nagapatuman it lockdown.
Samtang, may pila man segun nga mga Pinoy workers igto ro napahalin sa trabaho bangud sa pandemya ro owa gihapon nakauli sa Pilipinas bangud sa travel ban.
May una man segun nga natapos eon ro kontrata sa andang employer ag na-cancel ro visa.
Dugang pa segun kara ro mataas nga sukkot it mga airline nga nagaabot sa 30 to 50k kung iga-convert sa Philippine Peso.
Nagahueat segun ro mga raya sa repatriation it gobyerno.
Owa man segun nalisdan it mayad ro mga Pinoy igto nga owa it trabaho bangud kaabuan sa mga raya hay ginapaistar gihapon it andang mga amo sa andang baeay mintras nga owa pa nakauli ag ro iba hay ginabuligan it Filipino community igto. / ANN DESLENE SALAZAR
