Patay ang driver sang motorsiklo matapos mabungguan sang isa ka salakyan sa Brgy. Balijuagan, Roxas City takna alas 6:45 kagabi sang Dominggo.
Ginkilala ang napatay kay Argie Adorante Delos Santos, 23-anyos, residente sang Brgy. Cudian, Ivisan, Capiz.
Samtang ang driver sang Isuzu Dmax Double Cab nga salakyan ang ginkilala kay Henry Pionio Dela Cena, 33-anyos, isa ka negosyante kag residente naman sang Brgy. Poblacion, Mambusao kaupod ang iya duha ka pasahero nga sanday Matit Piara, kag Raffy Laging, lunsay 37-anyos.
Sandig sa imbestigasyon sang Roxas City PNP, ginapahayag nga ginasubay ni Delos Santos ang dalan gikan sa City proper sakay sa Suzuki Smash nga motorsiklo pauli sa iya lugar sang hinali ini nadulaan sang kontrol sa manubela kag naglapaw sa piyak nga linya rason nga bumunggo ini sa salakyan ni Dela Cena nga nagikan sa Mambusao.
Bangud sa natabo, nag-angkon sang patal nga pilas sa ulo kag nagkatuhay nga parte sang lawas ang biktima.
Ginpadangat ini sa Roxas Memorial Provincial Hospital para sa pagbulong apang ini ang gindeklarar sang doktor nga dead on arrival.
Ginkustodiya naman sang kapulisan si Dela Cena lakip ang mga salakyan nga naulamid sa nasambit nga aksidente para sa nagakaigo nga disposisyon. | Judy Ann Juare
