Arestado ang isa ka driver matapos nabaklan sang armas-luthang kag nakuhaan sang shabu sa Brgy. San Nicolas, Pilar, Capiz takna alas 5:50 kahapon sang Lunes, Hunyo 24.
Ginkilala ang subject sa operasyon kay Reynaldo Tupaz, 40-anyos, ginakabig nga Street Level Individual (SLI) kag residente man sang nasambit nga lugar.
Nahibaluan, nabaklan sang police poseur buyer ang suspek sang isa ka unit sang homemade pistolized breaktype 5.56mm nga wala sang serial number kag loaded sang isa ka bala; 2 live ammunition of 5.56mm, kabaylo sang P1,000 kun sa diin P100 diri ang buy-bust money kag 900 naman ang counterfeit money. Nakuha pagid sa iya posisyon ang isa ka sachet sang ginasuspetsahan shabu nga nagabug-at sang lima ka gramos kag may standard drug price nga P34,000 kag isa ka sling bag nga nagaduag itom.
Sa karon, nagapabilin ini sa kustodiya sang Pilar Municipal Police Station kag natalana nga pasakaan sang mga nagakaigo nga panumbungon. | Judy Ann Juare
