KALIBO, AKLAN—Pagapangunahan ni Department of Transportation (DOTr) Secretary Arthur Tugade do inagurasyon sa development projects sa Kalibo International Airport (KIA) hin-aga.
Sa anang facebook post, ginbida ni Sec. Tugade do pila sa mga natapos eon nga proyekto sa paeoparan kaibahan kara do expansion ag extension works sa bahin it international terminal building nga maghalin sa dating 1,584 sq. meters’ hay nangin 2,633 sq. meters’ eon makarun ag bangud kara hay nagbahoe do covered exterior lobby para sa mga pasaherong nagapila sa guwa it terminal.
Mas nga ginpaeapad man sigon do pre-departure area nga makabulig agud nga mangin komportable do pagpungko ag paghueat it mga pasaherong nagahueat it andang mga flight.
Dugang pa kara, mas naging mabahoe man do espasyo para sa Customs, Immigration ag Pre-Screening it mga pasahero ag do espasyo para man sa airline check-in counters agud makabulig sa pag-cater sa mas maaabong biyahero.
Ginpahayag pa it opisyal nga mag-eowas nga magatao rara it kasuehayan sa mga pasahero, nagtao man it daean do airport development project agud nga makabuligan nga makaangkon it trabaho do mga Aklanons kung siin nasayuran nga samtang una sa construction phase do proyekto, nagaabot sa 236 katawo do nataw-an it trabaho samtang 316 man do presenting nagatrabaho makarun sa paeoparan. // SHERRY ANNE REUNIR-VIDAL
