KALIBO, AKLAN — Owa pa it nababatun nga anumang reklamo ro taeatapan it DOLE-Aklan kaangot sa ginasugid nga pilang trabahador nga owa nakakabatun it sweldu samtang owa pa nabakunahan kontra sa covid-19.
Sa pahayag sa Brigada News FM Kalibo ni Mr. Joselito Dela Banda, Provincial Head it DOLE-Aklan, gindayaw nana ro mga Aklanon employers bangud owa nagapatuman ro mga raya it ‘no vaccine, no salary policy’.
Raya hay bangud suno kay Mr. Dela Banda, ginabawae raya sa idaeum it Labor Advisory No.3 series of 2021.
Ro mga workers nga indi magpabakuna hay kinhangean gihapon nga swelduhan ag indi i-discriminate.
Pero gin-engganyo gihapon it DOLE-Aklan nga magpabakuna para maabot ro herd immunity ag makabulig nga ro tanan hay maprotektahan.
Ag bangud may una nga indi pwedeng bakunahan bangud sa pilang kondisyon it andang kaeawasan, kinhangean man raya nga ikonsidera.
Sa mga gusto nga magpaabot it andang reklamo o concern, bukas ro taeatapan it DOLE-Aklan eabi pa ag may programa sanda nga Single Entry Approach nga magabulig sa employer-employee concern. / ANN DESLENE SALAZAR
