LEGAZPI CITY – Nagpagirumdom an Diocese of Legazpi sa publiko manungod sa pagselebrar nin Valentine’s Day ngunyan na aldaw, kun sain nataon man na Ash Wednesday.
Sa intrevista kan Brigada News FM Legazpi kay Fr. Rex Arjona, tagapagtaram kan opisina, sinabi kaini na sa Valentine’s Day, bako sana an pagkamoot sa partner, pamilya asin barkada an dapat na pigseselebrar kundi an pagkamoot sa Diyos.
Dugang pa kaini, ngunyan na aldaw, pigseselebrar man an Ash Wednesday, kun sain ini an pagpuon kan kuwaresma sa paagi nin paglahid ki krus sa angog, pag-ayuno, asin abstinence na parte kan ispiritwal na tradisyon kan Simbahang Katoliko.
Sa paagi kaini, napapahiling an importansya kan pagpapakumbaba asin paghagad nin tawad sa mga nagibong kasalan. | Brigada Interns Hannah Jamila Bitago & Eugene Rotian
