Gibarugan sa Department of Education o DEPED-XI nga dili pinugsanay ang pagpabakuna sa mga teaching ug non-teaching personnel.
Kini bisan pa man gilantaw ni Jenielito Atillo, tigpamaba sa DEPED -XI nga walay sayop ang himoong lakang sa lokal nga panggamhanan nag bakunahan ang mga magtutungha gikan sa lima ka eskwelahan sa syudad nga mosalmot sa pilot limited face-to-face classes.
Matud sa opisyal nga kinahanglan dunay kagawasan sa pagdesisyon ang mga ginikanan kung tugutan ang mga anak nga moapil sa face-to-face classes.
Kahinumdumang una nang gibutyag ni Davao City Mayor Inday Sara Duterte-Carpio nga kinahanglan bakunado ang mga teaching ug non-teaching personnel nga musulod sa lima ka eskwelahan alang sa F2F classes base sa rekomendasyon sa vaccination cluster.
Sa pikas bahin gikumpirma usab ni Atillo nga posibleng makuhaan pa ang 18 ka eswelahan sa Davao Region nga unang gitumbok nga mosabak sa F2F classes.
Kahibaluan usab bag-ohay lang gianunsyo sa DepEd nga sa Nobyembre 15 karong tuiga magsugod ang in person classes diin anaa lamang sa 50 ka tulunghaan ang gitugutan base sa resulta sa risk assesment sa mga lugar.BNFM-DAVAO
