GIAWHAG sa Department of Education (DepEd) sa GenSan ang mga ginikanan sa mga magtutungha nga magpa-enrol na. Kini dungan sa pag-abli sa enrollment period gikan gahapon Hulyo 26 hangtud na sa Agosto 22 ning kasamtangang tuig.
Matud ni Carlos Susarno, Asst. Schools Division Superintendent, taas nga panahon ang gihatag sa enrollment period sa pribado ug pampublikong tulunghaan. Ang aron makita nila ang mga expected nga ihap sa learners karong tuiga, nakalabay’ng tuig naa sa 180,000 enrollees gikan sa pribado ug pampublikong tulunghaan ang natala sa DepEd- GenSan.
Dugang ni Susarno, mahimong makapa-enrol online ug ibutang ang na fill -up na nga enrollment form sa mga drop boxes nga naa sa mga mall. Apan kung buot buot nga magpa-enrol nga personal, angayang magsuot og face mask ug mosunod sa social distancing ugaling dunay pila sa eskwelahan asa ipa-enrol ang anak.
Una nang, gibutyag ni Romelito Flores, Schools Division Superentendent nga hugot ipatuman sa pag-abli sa klase ang minimum public health standard batok Covid-19. Sa expansion sa face-to-face classes sa GenSan, wala’y natala nga estudyante ug magtutudlo nga natakboyan sa Covid-19. (Richel Gubalani)
